Aħfirli

Aħfirli ta' meta ndejqek meta nifraħ bik, qatt m'hi x-xewqa tiegħi

Li nweġġħek jew niskomodak.

Inkun biss eċitat, aktarx inkun ili ma narak xi ftit mhux ħażin.

Imsomma, ngħiduha kif inhi…

Anke ħames minuti bogħod huma biżżejjed

Għax kif nisimgħek iddawwar iċ-ċavetta

Jew iċċempel il-qampiena tal-bieb

Dak ifisser biss li int, sieħbi - ma kontx id-dar

U jeħtieġ li nilqgħak

Għax jien inħobbok

U aħfirli ta' meta weġġgħajtek għax ħtaftlek idejk.

Ridt nigdem il-ballun tal-isponża, mhux lilek

Ma kkalkulajtx sew, imma kif indunajt, 

Tlaqt kollox u ntfajt fuq dahri

Biex togħrokli żaqqi u nnessik

U tinduna li m'iniex kattiv 

Li kien żball

Li nħobbok

Aħfirli jekk ma nifhmekx mall-ewwel

Kultant indum ftit biex nieħu. 

Tort tiegħi, m'għandix dubju

Għax int tibda' tgħajjat umbgħad, u ġieli ssawwatni

Jew iċċaqlaqni minn ximkien bil-goff

Aħfirli meta ninbaħ ngħajjat

U nqajjem il-ġirien…

Nagħmel hekk ħafna meta nkun ferħan

Meta narak tixtieq tilgħab ftit miegħi

Żomm f'moħħok li int mhux dejjem tkun tista' 

Ttellagħni fuq il-bejt u tħallini niġri warajk

Il-bqija tal-ħin 

Meta int tkun ix-xogħol

Titkellem ma' ħbiebek

Tinnamra f'xi sodda

Jien inkun qiegħed waħdi fis-salott mdallam

Nixxennaq għal maħbuba

Li int qatt m'hu ħa tħallini mmiss

U qas li kieku

Għax fl-għerf tiegħek, sewwejtni

Aħfirli ta' kull darba li ninsa nitbissem

Aktarx inkun qiegħed niftakar

Li ma kull sena tiegħek

Qed jgħaddu sebgħa tiegħi

U kull siegħa li nkun waħdi

Nħossha seklu

Qalbi faċilment tiswied

Għax is-solitudni tnikkitni

Imbgħad jien…li kull ma nixtieq hu li noqgħod ħdejk!

M'hemmx bżonn dejjem nitkellmu ta…

Biżżejjed għalija nkun ma l-art

Fejn saqajk

Nżommlok kumpanija

Għax jien inħobbok

Aħfirli ta' meta npexpex mal-ħajt u tul il-kuritur

Meta turini ċ-ċinga u tgħidli 'tlaqna barra!'

Dak għax ma nkunx nista' nikkontrolla l-pjaċir

Meta nirrealiżża

Li int, sieħbi, lest tissagrifika ftit minn ħinek

Biex tagħmel passejn miegħi

Sinjal li int tħobbni ħafna wkoll

Nixtieq li kieku stajt nixjieħ miegħek!

Nixtieq inkun nista' nieħu ħsiebek!

Nħossni xxurtjat ħafna li ltqajna

Għax jien kull m'jien kelb, u bħali ssib kemm trid

Imma int tiegħi ħabib...għax int tiegħi is-sid

28 March 2012 at 23:56

Ma Bqajtx

U rġajt ħassejtni żagħżugħ,

Tfajjel innoċenti

B’ħajti quddiemi

U neħħejt il-pretensjonijiet kollha

Li akkumulajt maż-żmien

Qoxra ta’ suċċess proġettat

Li dejjem jitbiegħed pass iktar

U ma bqajtx pacifist

Ma bqajtx rejalist

Ma bqajtx liberali

Ma bqajtx anarkist

Ma bqajtx storbjuż

Spiċċat il-ġibda għal ismi

Il-glorifikazzjoni tal-istess

Li twassal biss għal-mewt

U ma bqajtx attivist

U ma bqajtx analitiku

U ma bqajtx soċjalist

U ma bqjatx intelletwali

U iffukajt ħsiebi fuq ix-xewqa waħdanija

Dik li nsib post fis-skiet

Fejn ma ndejjaq lil ħadd

Fejn ħadd ma jdejjaqni

Li did-dinja

U dan il-ġisem

Ma jħalluni qatt niskopri

Sakemm ikun tard wisq

Sħabi Sħab Tajjar

Sħabi sħab tajjar

Jgħatti l-medda tas-smewwiet

Purtiera trasparenti

Jsaffi d-dawl

Tal-qamar

Li jaqa’ hawn fuqi

Sabiex jien nista’ narah

28 February 2013 at 00:03

L-Għarwien tas-Salib

Taħt l-għoli tas-salib

B’qalb imnikkta mxejt

U tlabtek għall-għerf

Li minni int ħbejt

Sabiex inkun nista’

Nagħraf lill-għadu

Għax stħajjilt li floki

L-għerf huwa ħadu

U l-għerf int tajtni

U nfetħu għajnejja

Għall-kurċifiss tiegħek

U bżajt, Mulejja

Fuq l-għoli tas-salib

Dirgħajk miftuħa

Ġismek spulpjat

Imtertaq

Tiċrita waħda

Dagħwa b’Alla

Dagħwa bik

Beżqa f’wiċċek

Stajt tara lil min

Fiċ-ċokontu rabtek

Għajnejh għalaq

Għax sabek

Ma riedx jgħarfek

U għalhekk kasbrek

Mill-għoli tas-salib

Il-biża tiegħi

Tagħrafha

U tassigurani

Li dirgħajk miftuħa biżżejjed

Biex jilqgħu lili fihom

Ma jingħalqux madwari

Għax minix marbut

Dirgħajk miftuħa

Biex nibqa paxxut

Li nagħżlek, niċħdek

Ħadd m’hu sidi

Ħadd m’hu jorbotni

Jew iżommli idi

Mill-għoli tas-salib

Id-dnubiet tiegħi

Tagħrafhom wieħed wieħed

Inixxu ma’ demmek

Sat-trab tal-art

Taħt għarqubek qaddis

Il-wiegħda li

Minn dak il-piż

Inti tnaddafni

Għax int b’ibnek tafni

Mill-għoli tas-salib

Imwarrab ħassejtek

U għalhekk missejtek

Għax hekk tħassartek

Mdemmi, imkisser w’għarwien

Imkasbar, imwarrab w’għajjien

Iżda malajr nsejt

Kemm tajjeb jinħass is-sliem

U b’qalbi kollha niċħdek

F’inqas minn tlett ijiem

Aħfirli Mulej

Mhux għax jistħoqqli

Kieku kellek tkun verament ġust

L-għaraq ixoqqli

Naqta’ qalbi

Minn quddiemek nitwarrab

Niġġarraf

Taħt l-uġiegħ li nġarrab

M’iniex ta’ min

B’serjeta’ joħodni

Meta b’qalbi nkasbrek

Għall-gost ta’ min jobgħodni

Iżda nitolbok biss

Tħallini mmiss

Id-dawl ta’ għada

Għax forsi għada

Nikber farka

Narak aħjar

Nifhmek aħjar

Ninsa lili nnifsi

U hekk ntenni

Tismax talbi

Bl-għerf tlibbisnix

Għax jekk nasal nifhem

Min verament int

Maħfra ma jistħoqqlix

Nitolbok minflok

Biex ngħix dir-realta

Minn tiegħek dewwaqni

Daqsxejn umilta’

Biex ngħix bla ma nifhem

Għal tiegħek biss l-isem

Kull marka fis-salib

Kull musmar

Jorbot u jħoll

U llejl jisfuma f’nhar

U għada jisbaħ ukoll

Il-bieb infetaħ

S’issa ma ingħalaq qatt

Għax m’hemmx akbar ħabib

Minnek, l-għarwien tas-salib

25 March 2013 at 00:39

Krema u Żejt

Dejjem bżajt mill-krema w’miż-żejt

Lil saħħti ma jgħinux

U l-kulur ma jurux

Ta’ dak li jkun qiegħed jistenna

Xiber taħt

Sakemm il-krema tispiċċa

It-tidlik jitlaqqat

U tixref il-verita’

Qatt daqs dan iż-żmien

Ma rajna krema u żejt

Kollox sabiħ

Abjad verġni

B'subgħajk jixtiquk tmiss

Iżd' attent - kun af

Li l-krema tispiċċa

U għada pitgħada,

Malta tagħhom biss

4 March 2013 at 20:02

Mument

Il-ħajja ġiet għax hekk tagħmel

U kollox ħadem perfett

Siegħat kontanti

Dawl leblieb

Mumenti straordinarji

Mlew ħajja mill-ewwel nifs sa dan

U l-mewt waslet

U ġabet tmiem

Lill-ħin iffriżat

F'memorji griżi

Mingħir storbju

Mingħir dawl

Mhux bħal riefnu

Mhux bħal sajjetta

Mhux bħal żiffa

Iżda bħala mument ieħor

Mument ta' skiet

Mument bla rwejjaħ

Mument etern

Preżent etern griż

Fejn kien hemm il-ħajja ġiet il-mewt

Għax il-mument huwa issa

U dik hi l-ħajja

U dik hi l-mewt

21 March 2013 at 23:57

Poeżija lil min hu f'Poter Ekkleżjastiku

B’għajnejk ċanfartni

Leħnek ollejt

Biex semmajt lil Alla u fakkartu li int tiegħU

Iktar minni.

U d-dixxipli tiegħek jistudjaw kull pass li tagħmel int

Għaliex jaraw fik l-epitom tal-irġulija

U bħalek jixitiequ jsiru

Jarawk minn fuq l-artal

Iċċanfar il-folla

Draw il-maġija li tiġri

Meta bejn subgħajk tobrom l-ispag

Li jmexxi l-marjunett tal-kongregazzjoni

Li tiżfen mas-salmi tiegħek

Fosthom jien

Niflik, nagħrfek, nistudjak

U b’imħabba għal kull m’hu sagru

Niċħad lilek u l’kull ma tirrapreżenta

Għax ġiegħeltni nistmerr

Dak kollu li dejjem għaraft b’tajjeb

Imma issa ninduna

Għalxejn nistħtek, għalxejn nħalli l-preżenza tiegħek

Fuq il-maqdes tkiddni.

Illum nifhem, fhimt illum

Li f’din ir-reċta li fiha aħna protagonisti

Jien u int għandna rwoli differenti

Tiegħi li nitkaża bik minn fuq il-bank

U tiegħek li minn fuq l-anbone tammonini

Biss infakkrek

Għaraf sa’ fejn għandek tasal f’din il-parti li qiegħed tilgħab

Tinsa’ qatt li m’għandek l-ebda poter

Ħlief dak mogħti lilek mis-sema

U għalhekk, id-dnub tiegħek f’ismU huwa ikbar